АМРАЛТЫН ХӨТӨЛБӨР

Өдөр 1 – Танилцах аялал

Өглөөний цайны дараа баазын талаарх товч мэдээллийг өгөх бөгөөд хүүхдүүдэд зориулсан “аяллын тэмдэглэл” хэрхэн хөтлөх тухай богино хэмжээний сургалт, хичээлийг заана. Үүний дараа морин аялал маань эхлэх бөгөөд баазын эргэн тойрны сонирхолтой газруудтай танилцах явцдаа харзны усаар морио усалж, Цагаан овоон дээр гарч Эрчмийн нурууны төгсгөл, Булнайн нурууны эх болон Бүгсэй, Дэлгэрмөрөний бэлчиртэй танилцана. Морьдууд маань бүгд европ загварын эмээлтэй тул амрагчдыг ая тухтай аялах боломжийг бүрэн хангахын сацуу хүсвэл хамгаалалтын малгай болон гутлын түрий өмсөх боломжтой. Аяллын зай 6 км. Өдрийн хоолоо баазын ресторанд зооглонгоо “Гараг Студи”-ээс хийсэн баримтат киног үзэж Төмөрбулаг сумын эргэн тойрны байгалийн онцлог болон нутгийн иргэдийн амьдралын хэв маяг, уламжлалтай танилцахаас гадна Идэрийн цутгалан-бүтэн өдрийн аяллын талаарх мэдээллийг уг нэвтрүүлэг танд мөн өгөх болно. Явган аяллын цаг. Бэлчрийн дөрөлж болон Идэр голын дагуух Улаан хясаан дээр гарч дурсгалын зургаа авахуулна. Аяллын зай 5 км бөгөөд аяллын төгсгөлд Олон голын бэлчрийн ширэг дээр тусгайлан зассан оройн хоолны ширээ та бүхнийг хүлээж байх болно.

Өдөр 2 – Цутгалан аялал

Энэхүү аялал маань бүтэн өдрийн аялал бөгөөд баазаас нэг талдаа 45км зайтай ба 2 цаг машинаар явна. Аяллын замдаа Хангайн нурууны өндөр, хэц даваануудыг давахаас гадна Монгол орны нэгэн нууцлаг газартай танилцах сонирхолтой аялал байх болно. Зураг авахад хамгийн тохиромжтой аялал тул та аппаратаа мартав. Зорьсон газартаа хүрсний дараа үйлчилгээний баг хээрийн хоолны бүх бэлтгэлийг ханган ажиллах тул та байгалийн анир чимээнд өдрийн хоолоо амтархан зооглож, аян замын алжаалаа тайлна. Уг аяллын хамгийн сонирхолтой хэсэг нь Идэрийн цутгалангийн хясаа, түүний эргэн тойрны байгалийн үзэсгэлэнт тогтоцтой танилцах явган аялал юм. Аяллын зай 2 км. Үүний дараа бид баазруугаа буцах бөгөөд амтат оройн хоол биднийг хүлээж байх болно.

Өдөр 3 – Монгол ахуй, соёл

Амрагчид хөтөч, тайлбарлагчийн зааврын дагуу 5 ханатай монгол гэрээ барих бөгөөд хүсвэл барьсан гэрээ тохижуулж хоноглох боломжтой. Мөн барьсан гэртээ шагай шүүрэх, няслах, морь уралдуулах зэрэг олон төрлийн шагайн наадгайгаар тоглон цагийг зугаатай өнгөрүүлнэ. Томчууд, хүүхдүүд үндэсний сур харваагаар цэц мэргэнээ сорьж цагийг зугаатай өнгөрүүлэхээс гадна элсний хөл бөмбөг, волейбол болон элсэн дээр чаргаар гулгах боломжтой тул таны гэр бүлийн мартагдашгүй нэгэн дурсамж бий болно гэдэгт итгэлтэй байна. Мөн байгальтайгаа ойрхон байх, танин мэдэхүйн зорилгоор хүүхдэд зориулсан загас барих дадлага бүхий амралтын арга хэмжээ энэ өдөр зохион байгуулагдах бөгөөд байгаль орчиндоо ээлтэй байж барьсан загасаа буцаан тавина. Харин үдшийн бүрийд амрагчид хүсвэл тусгайлан зассан талбай дээр, түүдэг галын илчинд амралтынхаа тухай зугаатай яриа өрнүүлэн аяллын тэмдэглэлээ бусдадаа хуваалцаж цагийг зугаатай өнгөрүүлэх боломжтой. Учир нь энэ орой бүрэн автомат систем бүхий хүчирхэг дурангаар оддын ертөнцөөр аялах сонирхолтой хөтөлбөр хүлээж байгаа.

Өдөр 4 – Усан аялал

Дэлгэрмөрөн, Сэлэнгэ, Идэр голоор моторт завиар аялах бөгөөд зөвхөн моторт завины аяллаар та Олон голын бэлчрийн байгалийн тэрхүү онцлог, өвөрмөц тогтоцтой танилцах боломжтой юм. Хоёр моторт завиар нэг ээлждээ тав, таван хүн буюу 10 хүн нэгэн зэрэг аялах боломжтой. Бүх зорчигчдыг аврах хантаазаар хангахаас гадна аюулгүйн зааварчилгааг танилцуулснаар аялал маань эхэлнэ. Тус аяллаар та өвөрмөц зургийн цуглуулгаар дурсамжийн зургийн сангаа арвижуулна гэдэгт итгэлтэй байна. Каяак завины аялал маань хоёр хэсгээс бүрдэх бөгөөд анх удаа аялах гэж буй амрагчдад зориулсан аюулгүй ажиллагааны зааварчилгаа болон дадлага сургуулилтыг баазын ойролцоо Дэлгэрмөрөн голын салаанд, тогтуун урсгалтай хэсэгт зохион байгуулна. Харин үндсэн каяак завины аялал маань Хөвсгөлийн их тайгаас эх аван урсах Дэлгэрмөрөн голын дагуу 5-8 км аялна. Байгалийн анир, чимээ, өвөрмөц тогтоц болон нутгийн иргэдийн аж байдал танд сэтгэлийн их амар амгаланг мэдрүүлэх бөгөөд байгальтайгаа хамгийн ойр мэдрэмжийг та уг аяллаар авах болно. Усан аяллын төгсгөлд өдрийн хоолоо баазын ресторанд зооглох бөгөөд түүний дараа малчин айлд зочилж ямаа сааж сурахаас гадна бяслаг, цагаан идээг хийх явцтай танилцаж, хүсвэл өөрсдийн гараар хийж үзэх боломжтой.

Тэмдэглэл

Амралтын хөтөлбөрийн өдөр, дараалал болон хийх зүйлсийг амрагчид өөрсдийн сонирхолд нийцүүлэн урьдчилсан захиалгаар өөрчлөх бүрэн боломжтой. Мөн тухайн өдрийн цаг агаарын нөхцөл байдлаас хамааран хөтөлбөрийн арга хэмжээнд өөрчлөлт хийгдэж болно.